France-a nawrh huaihawt zinga mi 1,000 chuang man

France ramah Inrinni khan trade union lian ber, Confédération Générale du Travail(CGT) huaihawtin an rama thil man sang zel duh lohna, zirna in leh a enkawlna ṭha lo leh hleih nei rorelna, intluk tlan lohna nasa zel duh lohna lantir a ni leh a, hmun tam takah buaina a chhuak leh. Police-te chuan nawrh huaihawt zinga mi, tharum thawhna thlennaa inhnamhnawih mi 1,000 chuang an man tih an sawi.

Paris khawpui bakah Marseille, Lyon, Bordeaux, Lille, Toulouse, Montpellier leh Nantes-ahte mi tam tak pungkhawmin lungawi lohna an lantir. Pungkhawmte hnawhdarhna atan riot police-te chuan tear gas leh water cannon-te an hmang a ni.

Interior Ministry chuan Inrinnia khawpui hrang hranga nawrh huaihawtte chu mi 410,000 vel niin a chhut a, hetih lai hian a huaihawttu lam chuan 800,000 an tling niin an sawi ve thung. Nawrh huaihawtna hmasaa buaina nasa tak chhuak a, thil tam tak tihchhiat a nih vangin, kar liam taa nawrh huaihawt dawn vang hian police officer 70,000 vel chu venhim hna thawk tura dah an ni.

Interior minister Laurent Nunez chuan nawrh huaihawt hmasa aiin buaina chhuak pawh a ziaawm a, police-te pawh an che chhuak chak a, a hma aṭangin sumdawnna hmun hrang hrangte venhimna ṭha tak kalpui dan tur pawh an lo buatsaih lawk a ni, a ti. Nawrh huaihawt ni hian Paris leh khawpui ṭhenkhatah chuan partial curfew puan a ni.