Pakistan-in Iran ramri a hawng

Pakistan sorkar chuan Iran nena an ramri pawimawh chu kar khat chhung a khar hnuah Inrinni liam ta aṭang khan a hawng leh ta. Ramri khar a nih vang hian bungrua phur motor tam tak an tangkhang a, hei bakah LPG supply thlengin a khaihlak phah a ni.

Balochistan province-a Gwadar district-a Gabd-Rimdan crossing hawn a nih hnu hian ram pahnihte insumdawn tawnna pawh kalpui chhunzawm nghal a ni. Gwadar Chamber of Commerce and Industry president Naveed Jan Kalmati chuan ramria tangkhang motor tam tak pawh chhuah tir an ni tih a sawi. Bungraw inthawn leh lak luh pawh dan pangngai anga kalpui nghal a ni, a ti. Ramri hawn a nih leh tak avangin Pakistan rampuma LPG indaih lohna nasa tak thleng mek pawh a ziaawm chhoh leh, energy leh ei tur man sang lutuk pawh a hniam phah a beisei thu a sawi.

Gabd-Rimdan crossing hi October 17 khan Commerce Ministry chuan a khar a, khar a nih chhan hi a sawilang lo a, mahse security lam thil vanga khar nia rin a ni. Hemi hnu hian tualchhung thuneitute chuan security dinhmunte thlirin, ramri kaltlanga bungraw phur motor tlan ṭhinte vengtu dah belhte an rawt. Hemi hnu hian ramri hi hawn a ni leh ta a ni. Pakistan leh Iran hian ramri km 909-a thui an inṭawm a ni.