Indonesia-in ram kang khu tuartute tan oxygen bus thawn

Indonesia sorkar chuan ram kang nasa tak thlenna, Borneo thliarkara cheng, meikhu avanga harsatna tawkte puihna turin oxygen bus a thawn.

Kumtinin Indonesia-ah hian ram kang nasa tak a thleng fo a, a bikin Sumatra leh Borneo thliarkarah te a thleng nasa ṭhin. Kumina hian kum 10 chhunga ram kan nasat ber ṭum an tawk a ni. Hei vang hian meikhu a zam nasa a, a mi cheng zinga thawk lama harsatna nei pawh an pung nia sawi a ni. Sumatra leh Borneo biala hmun tam taka air pollution level chu 1,000 chuangte a tling. Pollution level 300 chin chunglam chu mihring hriselna atana hlauhawm pha nia sawi a ni ṭhin.

Health department chuan oxygen bus-ah hian oxygen tank dahin, damdawi lama mi thiamten an vil bawk tih a sawi. He service hmang hian meikhuin boruak a tihbawhlhawh avanga pawn chhuahnaa thawk lama harsatna tawkte puih an ni dawn tih a tarlang. Kumin bikaah ram kang khu avanga thawk lama harsatna tawk hi August aṭanga October 25 thleng khan mi 250,000 an awm tawh tih Health Ministry chuan a tarlang. Sorkar chu ram kang thlen ṭhin veng tur leh, a ṭhelh hna pawh chak tawka kalpui tura phutin lungawi lohna pawh lantir a lo ni tawh ṭhin.