Flavio Bolsonaro-a'n Brazil a chhuahsan

Brazil president thlanna, Pathiannia neih zawh taka chak zo ta lo, senator Flavio Bolsonaro leh a chhungte chuan an ram chhuahsanin US an pan. US State Departmetn chuan Bolsonaro leh a chhungte hi US visa an lo pe dawn tih a tarlang.

Bolsonaro hian president thlannaa hnehna changtu, president ṭanglai Luiz Inacio Lula da Silva a hneh lo tih a la sawi duh lo a ni. Inthlan zawhah Brazil Supreme Court-in a passport theh lut tura darkar 24 hun a pek thu leh, Brazil ram chhuahsan khapsak a nih thu a lo sawi tawh a ni. Mahse, a passport hi theh lut duh loin, a nupui leh fanu pahnihte nen an ram hi an chhuahsan ta a ni. Khawi hmunah nge a awm chiah erawh sawichian a ni lo.

Brazil president Lula chuan a hma aṭangin US chu Bolsonaro chhungkua thlawp a, thuneihna chelhtir leh ngei tum niin a puh a, hei vang hian an inkar pawh a ṭha lo a ni. US-in Flavio Bolsonaro an rama luhtir a phalsak leh hian an boruak pawh a tihchhiat zual belh rin a ni bawk.

US president Donald Trump chuan an rama Flavio Bolsonaro luh chu a pawmsak dawn tih nimin khan a sawi a, mi ṭha tak nia a ngaih thu leh, Brazil inthlanna neih zawh tak chu mak leh ṭha lo tak a ni thu a sawi zui bawk. Hemi rual hian Lula leh Flavio chungchangah ṭan lam a nei lo tih a sawi a ni.

Bolsonaro hian inthlana a chak lo a pawm thu a la sawi lo a, vote thlak danah thil fel tawk lo a awm nia sawiin inthlan result hi hnawl turin a phut a ni. Mahse, a part Liberal Party chuan Lula chak chu an pawm thu an sawi tawh thung.