US midterm election-ah Democrats party chak

US midterm election, November 3-a neihah House of Representative-ah Democrats party chuan president Donald Trump-a party, Republican party an hneh. Democrats lam hian Congress in hnih - House leh Senate an thunun thei dawn ta a ni. Inthlan official result erawh tihchhuah a la ni lo.

Midterm election-ah hian House of Representative-a seat awm zawng zawng, seat 436, Senate-a seat awm zat 100 aṭangin seat 35 bakah, state 365-ah governor, attorney general thlanna neih a ni a, local election eng emaw zat neih tel a ni bawk.

Inthlan result kimchang tihchhuah la ni lo mah se, result hriat tawh chinah Democrats an che ṭha hle a, House of Representative-ah result h riat theih chinah, seat 339-ah seat 213 la tawhin, Senate-a seat seat 53 an nei tling bawk.

President Donald Trump chuan inthlan result chu a pawm thu sawiin, Democrats chu a lawmpui thu a sawi a, an ram ṭhatna turin ṭha taka thawhpui a tum thu a sawi. Hemi rual hian midterm election-ah hian a chuh ve lo a, chuh ve ni se chuan Republican lam chu an chak ngei ang tiin a sawi.

Inthlanah Democrats lam chak mah se, Donald Trump president nihna erawh a danglam phah dawn lo. President hi a hrana thlan an ni a, hei vang hian midterm election hian president dinhmun hi a tidanglam chuang lo a ni. Mahse, Democrats lamin Congress in hnih an thunun dawn tak avangin, president Trump tan a bill leh rawtna siamte erawh a tlangpui a harsa tawh dawn. Democrats lam tan majority an neih tawh dawn avangin House leh Senate-ah Trump-a dan siamte lo dangin, thil dik tawk lo nia puhna chungchangah pawh an chhui thei dawn a ni. Hei bakah Senate an chakna hmangin judicial appointment leh nomination pawh an thunun thei dawn bawk. Hetih lai hian President hian Congress-in dan a pass-te lo dang turin thuneihna, veto power a nei a, hei hi Trump hian a hman chhoh pawh a rinawm. Democrats chak a pawm thu a sawi hnu lawkah pawh, a social media-ah Trump chuan baseball lukhum sena 'VETO' tih ziahna chu a post zui a ni.