Paraguay-a Ueno Bank tlachhiain customer mtd 3 nghawng; Eptu pawlin President Pena bang turin an phut

Paraguay rama digital bank lian, an ram president Santiago Pena nena inzawmna nei, Ueno Bank chu an sum dinhmun tehna pakhat, solvency ratio-ah danin a tlem thei ber china a pawm, legal minimum chanve pawh a phak loh avangin tlachhiaah puan a ni a, kar tir lam khan Paraguay Central Bank (BCP) inrawlhin Ueno Bank hi an kutah an la a ni.

BCP kuta Ueno Bank a awm hnuah Ueno app, card leh transfer-te chu hrek nghal vek an ni. Customer mtd 3 vel chuan an account an khawih che thei tawh lo a, hei bakah bank-a pension fund USD mtd 380 invest pawh a dinhmun a him lo hle. He thil thleng hian ram mipui a tichiai a, an ram pum sum dinhmun thlengin a nghawng dawn niin an ngai a, lungawi lohnate an lantir a ni. Mahse, BCP chuan he buaina hi Ueno Bank kaihhnawih chauh a nih thu leh, an ram financial system tana hlauhthawn phahna tur a awm lo tih an sawi thung.

Solvency ratio hi company-in hun rei zawk daih tur ba rulhna turin a sum hmuh leh a thil neihte chu a tawk em tih leh, hlawkna a tel thei dawn em tih tehna a ni. Hei hi company sum dinhmun nghehna enna atana thil pawimawh tak a ni.

Digital lender, Ueno Bank-a fund invest leh customer-te sum dah hi USD mtd 850 dawn a tling a, president Pena chu kumin March thla thleng khan Ueno enkawltu, Grupa Vazquez-ah shareholder a ni. Hei vang hian bank tlakchhiat chungchang hi President hian pension fund dik lo taka hman leh, a hlawkna tam tak a lo tel tawhte thupna atana hmangah eptute chuan an puh a, bang turin an phut. Parliament-ah President ban phutna hi put luh an tum a, rorellai Colorado Party member ṭhenkhatin thlawp an tum niin an sawi.

Eptu hruaitu, Rocio Vallejochuan Congerssional session-ah ni khat thil thuah an ram mipui mtd 3 te chunga harsatna leh buaina lian tak thlen hi an ram chanchinah a la awm ngai lo tiin, he thilah hian President chu mawhphurtuah a puh a ni.