Bangladesh PM hlui Hasina-i'n December-ah an ramah kir tum

Bangladesh prime minister hlui, kum 2024-a paihthlak a nih hnuah India rama tlanchhia, Sheikh Hasina-i chuan kumin December thlaah an rama kir leh ngei a tum tih a sawi.

Kum 2024-a zirlaite kaihhruaia Hasina kaihhruai sorkar laka lungawi lohna lantira nawrh huaihawt a nih hnuah, Hasina hi India ramah tlanchhiain tun thlengin a la awm a ni. Kum 2025 khan Bangladesh special tribunal chuan nawrh huaihawtte beih let an nih avanga mi eng emaw zat an thih leh hliam chungchangah, hetih laia sorkar hotu Hasina hi mawhphurtuah puhin thubuai a siamsak a, a thubuaiah hian thiam loh chantirin thi turin a chungthu a rel a ni.

Bangladesh sorkar chuan Hasina hi an rama thawn kir turin ṭum eng emaw zat a ngen tawh a; mahse, India hian a thawn kir duh lo a ni. Amah Hasina hian August thla khan kuminah an ram kir a tum thu a sawi a ni. "Ka thihna tur a nih pawhin, kan ram leilung ngeiin, kan mite bulah thih ka duh zawk a ni," tiin a sawi. An ram a thlen rualin man tawkin, tan-in khung leh tihhlum pawh a ni thei tih a hriat thu a sawi a, mah se ram dang aṭangin an ram mipuite tawrhna lo thlir reng chu a theih loh thu a sawi.