Hong Kong activist Joshua Wong kum 10 tang turin hrem

Hong Kong pro-democracy activist, Joshua Wong chu nimin khan Hong Kong High Court chuan national security law hnuaiah kum 10 tang turin a hrem. Wong hi kum 2020 aṭang khan jail-ah tantir a ni tawh a, nakkum January thlaah chhuak tur a nih laiin, court chuan kum 10 dang tang turin a hrem belh leh.

Kum 30 mi, Wong hi kum 2019-a Hong Kong-a democracy thlawptuten sorkar laka lungawi lohna lantira nawrh an huaihawtnaa hruaitu zinga mi a ni a, hemi avang hian man a ni zui a ni. Hong Kong sorkarin national security law a siam thar hnuaia police-ten an mi mante China rama thawn phalsak duh lohna lantirin nawrh an huaihawt a, a hnuah pro-democracy movement angin kalpui zui a ni. He movement-a langsar leh hmalatu ber chu Wong hi niin, news channel lamah a lang fo a ni. Mahse, thuneitute chuan phalna nei loa sorkar laka lungawi lohna leh helna lantir a, buaina chawh chhuah tuma puhin an man a, thubuai an siamsak a ni.

Nimina court thuchhuak hi rights group leh ram dang sorkar hrang hrangin an sawisel a, Hong Kong-a US consulate chuan Wong chu chhuah nghal tura an phut thu a sawi. Taiwan pawhin na taka sawiselin, China leh Hong Kong sorkar chu mipui dikna chanvo rahbehsak leh, dik lo taka thubuai siamsakah a puh bawk. Human Rights Watch chuan Wong hremna pek belh a ni chu an dem thu sawiin, an puhnate chu belhchian dawl lo a ni, a ti. Amnesty International pawhin Hong Kong national security law chu sorkar sawiseltute hremna hmanrua atan hman a nihzia tilangtu a ni tiin a sawi bawk.