Ueno Bank buaina kal zelah Paraguay President a bang

Paraguay-a digital bank lian, Ueno Bank tlakchhiat vanga Central Bank-in a lak hnua Ueno Bank-a account neiten an account leh sum an khawih chet theih loh avangin lungawi lohna lantir chhunzawm zel a ni. Ueno Bank buaina kal zelah Ningani khan Paraguay president, Santiago Pena chu banna a theh lut.

Central Bank-in Uneo Bank a lak hnuah, customer mtd thum velte account chu khawih chet theih loha hrek a ni a, an account-a sum an dah pawh an la chhuak thei lo a ni. Hei bakah bank-a pension fund leh thil dang dahte pawh khawih theih lohin hrek a ni bawk. President Pena hi a hmain Ueno Bank enkawltu, Grupa Vazquez-ah shareholder a ni ṭhin a, hei vang hian he thil thlengah mawhphurhna neia puhin sawiselna pawh a tam hle. Eptu pawl chuan Ningani vek khan lungrual takin President hi paihthlak a nih theihna turin hma lak an rel a, mahse, Parliament-a an put luh hmain Sena hian banna a theh lut ta a ni.

Pena chuan President a nihna aṭanga a ban thu hi X-ah video post-in a puang a, mipuiten a laka rinna an neih tihchhiat chu a duh ngai lo tih sawiin, a ngaih pawimawh ber chu Paraguay mipui, an ram financial system rinngama sum dahtute rilru thlamuang taka an awm theih chu a ni, a ti.

Congress chuan President-in a ban thu a puan hnuah chamber pahnihah emergency session a ko a, Pena banna chu pawm tur nge, pawm loa Parliament-ah eptu lamin ban tir tura impeachment motion put luh an tum chu ngaihtuah zawk tur tih an rel dawn.