Belgium-in dan loa pem lutte in dap phalna tur pawm

Belgium parliament chuan nimin khan an rama dan loa pem lutte in, police-te an dap sak theihna tur dan siam a pawm.

Prime minister Bart de Wever kaihhruai right-wing ṭangrtual sorkar an rama pem lutte titlem tur hian hma a la a, dan loa lut an ram chhuahsan tura hriattirte pawh dap chhuah hna nasa zawka thawka thawn chhuah zel an tum.

Parliament dan an pawm tak hi human rights groups leh lawyer-te chuan an lo sawisel fo tawh a, police-te mimal ina luh leh dap phalsakna siam chu privacy law bakah mihring dikna chanvo neihte ngaih pawimawh lohna a ni, an ti. Bill hi pass a nih hma pawhin Brussel-a Palace of Justice-ah mi 3,000 velin human chain siamin duh lohna an lo lantir tawh bawk. Hei bakah an ram chhunga khawpui hrang hrang 50 velah lungawi lohna lantir a ni bawk. Amnesty International pawhin parliament member-te chu he dan hi hnawl turin an ngen a ni. Mahse, sorkar chuan he dan siam hi an rama phalna nei loa lut, an ram mipui leh security tan pawha hlauthawnawmte thawn kir an nih theihna tur hmanraw pawimawh tak a ni tih a sawi thung.

Lungawi lohna lantir a nih mek karah Ningani zan khan Parliament-ah bill hi sawi ho a ni a, hun rei tak an sawi ho hnuah nimin zing khan an pawm ta a ni. Dan loa pem lutte in police-ten dap phalsakna siam a nih rualin, in an dap hun hi zing lam dar 5 -9 inkarah chauh phal a ni thung.