Poland-a inpawng kahna thlengah mi 6 an thi

Plandra rama Krakow khawpuiah Inrinni chawhnu lam khan Main Market Square-ah mi pakhatin silaiin mi a pawng kah a, mi paruk an thih bakah hliam tuar 10 chuang an awm.

Police-te chuan pawikhawihtu hian tum bik pawh neih loin, motor-a tlan pahin Main Square-te awmte chu a pawng kah niin an sawi. Hliam tuar zingah police officer pawh an tel. Pawikhawihtu hi kum 25 mi vel niin, police-te hian bei letin an man a, an inkahnaah an kap hliam bawk niin an sawi.

Prime minister Donald Tusk chuan he thil thleng hi uluk taka chhui chian mek a nih thu a sawi. Pawikhawihna thlentu in an dapnaah ruang pathum hmuh a ni bawk tih a sawi a, police-te chuan a nu leh pa bakah a farnu-te ruang niin an sawi a ni.

Krakow police thupuangtu, Katarzyna Cislo chuan silai hmetpuaktu motor-ahhian ralthuam dang pawh eng emaw zat an hmuh chhuah thu a sawi a, a pawikhawihnaah hian thurualpui a nei lo nia a lan thu a tarlang.

Krakow hi Poland rama khawpui lian pahnihna niin, an ram khawpui Warsaw aṭanga km 250 vela hlaah a awm a ni. Khualzinte an tlawh nasain kumtin tlawhtu hi mtd 15 vel an awm ṭhin. Main Square hi khawpui laili laia awm niin, khualzinte tlawh nasat hmun a ni bawk.