Israel sipaite beihpui thlaknaah Islamic Jihad hotu a thi

Israel sipaiten Gaza Strip-a beihpui an thlaknaah, Palestinian group Islamic Jidad commander Bahaa al-Atta a thi. 

Nimin zing khawvar hma khan Israel sipaite hian Atta chenna in hi thlawhtheihna hmangin an bei tih an sawi a, sipaite chhan let nan Pales­tinian group-te hian rocket hmangin Israel an bei let bawk. Palestinian group hian Israel hian Syria khawpui, Damascus-a an hotu pakhat in pawh an bei tel tih an sawi.

Islamic Jihad chuan Israel sipaite Atta chenna in an beihnaah hian Atta bakah a nupui pawh a thi a, midang pahnihin hliam an tuar bawk tih an sawi. Atta phuba chu lak ngei an tum thu an puang nghal bawk. Gaza Strip-a roreltu, Hamas pawhin he pawikhawihna thleng vanga boruak ṭha lo a thleng chho a nih chuan Israel chu mawhphurtu a nih tur thu sawin, Atta thihna chu ngawih bopui mai an tum lo tih an sawi. 

Hetih lai hian Israel sipai­te chuan Atta laka beihpui thlakna tur hian prime minister Benjamin Netanyahu chuan phalna a pe tih an sawi. Atta chu rocket, drone leh sniper hmanga Israel beihna hrang hrangah mawhphurtu a nih thu leh, Israel rama luhruk pawh a tum thu an sawi bawk. "Abu al-Atta hi Gaza Strip-a Islamic Jihad te pawikhawihna hrang hrang thlenah leh, bomb tihpuahna tam zawkah a mawhphurtu a ni, " an ti. 

Nimin zing vek kha Israel sipaite chuan Syria khawpui, Damascus-a Islamic Jihad official, Akram al-Ajouri  in chu missile in an kap bawk a, a fapa leh a tunu an thi niin Syria state media chuan a tarlang. Israel-in missile pathum kapchhukain, pakhat hi chu an lo dang thei tih Syrian official chuan a sawi a, a dang pahnih hian Ajouri in hi a fuh a, mi pahnih an thih bakah midang pakuain hliam an tuar a ni.