Afghanistan-in Taliban firfiak pathum chhuah dawn

Afghanistan sorkar chuan Taliban firfiak pathum an man an chhuah dawn thu leh, heng mite hi Taliban firfiakte'n an man ramdang professor pahnih nen an inthleng tur thu President Ashraf Ghani chuan a sawi.

"Ngunthluk taka kan ngaihtuah hnuah, ramdangte puihnaa kan man, heng Taliban firfiak pathum, Afghanistan Bagram tanina  tang mekte chhuah zalen turin thutlukna kan siam ta a ni. He thuthlukna hi thuthlukna siam harsa tak a ni," tiin president Ghani chuan firfiak pathumte chungchang a sawi.

Afghanistan sorkarin a chhuah tur Taliban firfiakte hi Anas Haqqani, Haji Mali Khan leh Hafiz Rashid-te an ni a, heng mi pathumte hi Afghanistan-a firfiak pawl hluar leh hlauhawm ber zinga mi, Haqqani network nen an inzawm nia sawi a ni.

Taliban lamin an chhuahsak ve tur professor pahnihte hi Kevin King (American) leh Timothy Weekes (Australian)-te an ni a, anni pahnih hi firfiakte hian kum 2006 khan Kabul-a American University pawna an awmlai an rubo a ni.