Syria-a rescue group dintu ruang chhar

Syria rama volunteer rescue group dintu, British army officer hlui James Le Mesurier ruang chu Turkey-ah Thawhṭanni  khan chhar a ni. 

Mayday Rescue group dintu leh CEO Mesurier ruang hi Turkey khawpui, Istanbul-a Beyoglu district-a a chenna in bulah hmuh a ni a, mosque-a kalten an haw lamah an hmu a ni. Istanbul governor officer chuan Le Musu­rier thih dan hi chhui chian nghal a ni tih a sawi. A ruang an hmuh hian a lu leh ke-ah hliam na tak hmuh a ni a, mahse police-te chuan a in-ah hian midang lut leh chhuak an awm loh avangin amah hi a chesual nia a lan thu an sawi. 

Mesurier-a pawl din, Mayday Rescue group hian Syria Civil Defence, White Helmets te training an pe ṭhin a ni. Mayday chuan Mesurier hi hruaitu ṭha leh hmathlir nei ṭha tak a nih thu sawiin, tualchhung buaina leh leilung chhiatna thleng tuartu civil mite ṭanpui turin a inpe a, a hnathawk ropui tak hi Syria chuan a hre reng a ni, a ti. 

Kum 2016 khan Syria civil mite tana a hnathawh ṭhat avangin Queen Elizabeth II chuan Le Mesurier hi chawimawi-na sang, Order of the British Empire a lo hlan tawh a ni.