Bangladesh-a rel insuah mi 15 an thi

Bangladesh chhimchhak lam, Brahmanbaria district-ah nimin zing khan passanger phur rel pahnih insut avangin mi 15 an thi a, mi 58 in hliam an tuar bawk.

Sylhet aṭanga kal, rel pakhat zawk hi chhim lam Chittagong panin a tlan a, Chittagong aṭanga rawn tlan rel hi Dhaka kalkawi turin hmar lam panin a tlan thung a ni. An tlanna rel kawng inthlakna tur Mondobhag Railway Station-ah nimin zing 3 bawr vel khan an insu a ni. 

Rel pindan pathumte chu a chhe nual nia sawi a ni a, thi leh hliamte hi hei aia an tam rin a ni bawk. Sylhet leh Chittagong inkara rel service dangte pawh cancel zui an ni. Thi leh hliam tuarte hi a rang thei ang berin chetsualna hmun aṭanga damdawiin hnai berah kalpui nghal an nih thu district police chief Anisur Rahman chuan a sawi.

Chetsualnna thlen chhan hi hriatchian theih a la ni lo a,  police-te chuan an chhui mek a ni. Bangladesh president Abdul Hamid leh prime minister Sheikh Hasina-te pawh thi leh hliamte an tawrhpuina thu an sawi ve ve bawk.

Bangladesh-ah hian rel accident hi thil thleng fo a ni a, chetsualna tam zawk hi signal leh rel infrastructure ṭhat tawk loh vang nia sawi a ni.