Bangladesh PM hlui Hasina-i'n passport thar a dil

Bangladesh prime minister hlui, India rama tlanchhe mek Sheik Hasina chuan passport thar a dil a, an ram Foreign Affairs Ministry chuan a dilna hi a ngaihtuah mek.

Sheik Hasina hi kum 2024 August thla khan an ram zirlaiten a kaihhruai sorkar policy duh lohna lantira nawrh an huaihawt hnua buaina nasa tak a chhuah zui hnuah India ramah a tlanchhia a ni. An ram a chhuahsan rual hian Bangladesh sorkar chuan a passport chu a cancel sak nghal a ni.

Hasina hian August thla khan khan press conference neiin, December thlaah Bangladesh-ah kir leh a tum thu a puang. An ram a chhuahsan hnuah, nawrh huaihawtte laka police-te chetdan chungchangah mawhphurtuah puhin, an rama special tribunal chuan Hasina hi thi turin a chungthu a lo relsak tawh a ni. Mahse, a thubuai amah emaw, a aiawhte emaw pawh awm loa rel a nih avangin sawisel pawh a hlawh hle. Hasina hian police-ten nawrh huaihawtte an beih let chungchangah tun thlengin thupha chawina engmah a la sawi lo a, police-te thlavang a hauh zawk a ni.

Bangladesh junior minister of foreign affairs Humaiun Kobir chuan India nena an mi duh inpek tawnna tur, extradition treaty an neih hnuaia Hasina hian an kuta hlan tura an ngen fo tawh thu a sawi a, mahse tun thlengin India chuan a la hlan duh lo tih a sawi.