Russia a thlen veleh eptu hruaitu Navalny man a ni

Russia eptu hruaitu, Alexei Navalny chu tura hrai a nih avanga thla nga chhung Germany-a a inenkawl hnuah Pathianni khan Russia ramah a kir a, mahse an ram a thlen hian Moscow-a Sheremetyevo airport-ah police-ten an lo man nghal a ni. 

Russia prison service chuan eptu hruaitu hian ṭum tam tak a probation period a bawhchhe tawh nia sawiin, nikum December 29 aṭang khan man theih reng a ni tawh tih a sawi a ni. Court-in a chungthu hi a rel fel hma chuan Navalny hi hren a ni dawn tih a tarlang nghal bawk. Hei bakah Russia prosecutor-te chuan tun hnaiah Navalny hi a foundation din, Anti-Corruption Foundation leh charity dang tana sum an dawnte a mimal tana hmanga puhin thubuai an siam thar sak bawk. 

Kum 44 mi, Navalny hi nikum August 20 khan Seberia aṭanga Moscow pana thlawh­theihnaa a chuan laiin nikhaw hre loin a awm a, Siberia hospital-ah ni hnih enkawl a nih hnuain Berlin, Germany-ah lak a ni. Berlin-a enkawl a nih hnu hian Euro­pean expert-te chuan Navalny hi tur chi khat, Novichok nerve agent hmanga hrai niin an sawi a, mahse hei hi Russia chuan a pawm lo thung. Germany official-te chu tura hrai a ni tih finfiahna pe turin an phut a, Germany-a hruai a nih hma hian Navalny taksaa tura hrai a ni tih lanna engmah a awm lo a ni, an ti. 

Enkawl dam a nih hnuah Navalny hian man tawk nghal dawn mah se an rama a kir tur thu hi a sawi a, Pathianni khan a kir a, airport a thlen veleh man a tawk ta nghal a ni. A ruala haw a nupui Yulia erawh man a ni lo. 

Alexei Navalny-a'n Russia rama a kir tur thu a sawi hian ngaihven a hlawh nghal hle a, airport-ah journalist leh amah thlawptu mi tam takin an lo nghak a ni. Mahse a chuanna thlawhtheihna hi hun tepter takah Moscow-a a ṭumna tur airport chu thlaksak a ni. Moscow-a Vnukovo airport-a ṭum tur an nih laiin, Sheremetyevo airport-ah ṭumtir a ni ta zawk a ni. Vnukovo airport-a khawvawt tak, minus 22 Celsius hnuaia hun rei tak lo nghaktute chuan an nghak chhuak ta lo a ni. 

United States bakah Europe ram hrang hrangte chuan Russia eptu hruaitu Alexei Navalny man a ni chu demin,  Navalny chhuah leh nghal tur hian an phut. Mahse Russia chuan hei hi chhang let nghalin, an ram chhung thilah inrawlh lo turin dam dangte chu a vau let nghal a ni. 

US Secretary of state Mike Pompeo chuan Russia ram hruaitute chuan President Vladimir Putin leh a kaihhruai sorkar sawiseltu chu hmeh mih zel an tum a ni tiin, thu delhkilh awm loa Navalny chhuah nghal tura a phut thu a sawi. 

US President-elect Joe Biden-a natio­nal security adviser Jake Sullivan pawhin Navalny laka Russia sorkar chet dan chu  human rights palzutna chauh a ni lo a, Russia mipuite beihna a ni, tiin a sawi bawk. 

France, Italy, UK bakah EU member ram dang sorkarte  leh European Council president-te pawhin Navalny chhuah nghal tura an phut thu an sawi bawk a ni.