Biden-a'n Muslim ram aṭanga luh khapna sut nghal dawn
US President-elect Joe Biden chuan President office a luah ni khat niah, President kal chhuak Donald Trump-a'n Muslim ram ṭhenkhat aṭanga US luh khapna thupek a siam chu a sut nghal dawn.
Biden-a White House chief of staff, Ron Klain chuan Biden hian office a luah aṭanga ni 10 chhungin President Donald Trump-a policy eng emaw zat chu a sut nghal dawn tih a sawi a, heng zingah hian Muslim ram aṭanga luh khapna hi a tel dawn a ni, a ti. Hei bakah hian hripui leng dona kawnga hmalakna thar tur pawh siam nghal a ni dawn a, Paris climate change accord pawh zawm leh nghalin, US-a pem lutten US khua leh tui dik tak an nih theihna tur immigration dan pawh siam a ni ang, tiin a sawi.
Kum 2017-a US President office a luah hnu lawk khan Donald Trump chuan Muslim ram pasarih aṭanga US luh khapna thupek hi a siam a ni. Mahse he thupek hi khin a nih ṭhin avangin ṭum eng emaw thupek hi siam thar a ni.
Nikum October thla khan Biden chuan a campaign-naah, President a nih hunah an society-a Muslim huatna rilru awm ṭhin tibo tura theihtawp a chhuah pui tur thu leh, ram tana an thawhnate chawimawi a nih tur thu leh a kaihhruai sorkarah chuan level tinah Muslim American an awm ang, tiin Biden hian a lo tiam tawh a ni. hei bakahhian US-a document fel loa awm mek, mi maktaduai 11-te hnena khua leh tui nihna pek an nih theihna tura bill chu Congress-ah President a nih nikhat niah a thawn nghal tur thu a lo sawilang tawh bawk.