Sudan buainaah mi 80 chuang an thi tawh

Sudan-a West Darfur-a buaina chhuakah nimin thleng khan mi 83 an thi tawh tih Central Committee of Sudan Doctors (CCSD) chuan an tarlang. 

Buaina chhuahna hmun hi El-Geneina khaw­puiah a ni a, mi 160 chuang an hliam bawk a ni. Tualchhung hnam pahnih inkarah Inrinni zing aṭang khan buaina hi a chhuak tawh a, buaina chhuah chhan hi chiang taka tarlan a ni lo.

Sudan thuneitute chuan West Darfur-ah hian Inrinni aṭang khan curfew an puang tawh hial a, report ṭhenkhata an tarlan dan chuan Arab mi pakhat Arab mi ni loin a vih vanga buaina chhuak a ni a, inkahna a thleng zui a ni.

Sudan prime minister Abdalla Hamdok chuan Inrinni khan twitter-ah buaina bengdai turin buaina chhuahna hmunah security force tirh luh an nih thu a sawi a, thla hmasa lawka United Nations African Union Mission in Darfur (UNAMID) hnukkir a nih avangin helai hmuna buaina chhuak hi a punlun niin report ṭhenkhatah chuan tarlan a ni bawk.

Darfur-ah hian tual­chhunga hnam leh hnam inkara buaina chhuak hi thil thar erawh a ni lo a, kum 2003 pawh khan buaina nasa tak chhuak tawhin mi nuai thum vel zet an thih bakah mi maktaduai 2.5 lai chu hmun him lama sawn chhuah an lo ni tawh.

United Nations secre­tary-general Antonio Guterres chuan Pathianni khan thuchhuah siamin West Darfur, Sudan-a buaina chhuak chu pawi a tih thu sawiin, mitthi chhungte a tawrhpui thu a sawi. Antonio Guterres chuan Sudan thuneitute chu an theihna zawng zawng sawm khawma dan leh thupek kengkawh turin leh tualchhung mite venghim tura a duh thu a sawi a ni.