
Bangladesh-a thawktute nawrh vangin garment factory khar
Bangladesh-a thawmhnaw siamna factory-a thawktuten an hlawh tihpun phuta nawrh an huaihawt vangin, ram chhung hmun hrang hrangah garment factory 150 vel khar a ni.
Garment factory hi Bangalesh rama sumdawnna lian ber niin, kumtin ram pawn lamah an thawmhnaw siam USD tld 40 dawn an thawn chhuak ṭhin. Thawktu pawh mtd 4 vel an awm. Brand lian hrang hrangin factory an nei a, an zingah H&M, Primark leh Zara te pawh an tel. Factory sum lak luh hi an ram GDP aṭangin 10% a tling pha a ni. Hetih lai hian thawktute hlawh erawh a hniam hle a, thla khatah an ram pawisa taka 12,500 chauh an hlawh a, mininum wage chu taka 30,000 ah tihsan phutin an nuar a ni. Pathianni khan thawktute hian Gazipur-a Dhaka-Tangail highway chu thawktuten an dang a, darkar khat hnu velah police-ten an hnawhdarh a ni.
November 1 khan sorkar chuan thawktute hlawh ennawn a, pay structure siamṭhat dan ngaihtuah turin mininum wage board a din a, senior district judge-in kaihruaiin November thla tawp lamah hlawhbi thar chungchang tihfel an tum.
Bangladesh labour law hnuaiah "No Work No Pay" tih dan siam tel a ni a, he dan hnuaiah hian factory neitute chu nawrh huaihawt vanga an hnathawh a bahhlah phah chuan thawktute hlawh chu hrensak phalsak a ni. Hemi rual hian nawrh huaihawt avanga hun rei tak thawmhnaw an siam chhuak lo a nih chuan factory-te chu tiam chin awm loa kharsak theih an ni bawk.
Thawktuten nawrh an huaihawt chhunzawm zel chuan ram dang aṭanga thawmhnaw leitute tan harsatna a thlen thei dawn a ni. Hei vang hian Bangladesh Garment Manufacturers and Exporters Association (BGMEA) leh Bangladesh Knitwear Manufacturers and Exporters Association (BKMEA) chuan factory venhimna siamsak turin thuneitute an phut ve bawk a ni.