Imran Khan-a'n damdawi lam enkawlna pe thuai turin ngen

Pakistan prime minister hlui, jail-a tang mek Imran Khan chuan amah leh a nupui hriselna dinhmun a ṭhat loh zel thu leh, a rang thei anga damdawi lam enkawlna pe turin thuneitute a ngen.

Khan chuan kum 74 mi a ni tawh a, hetianga ngaihthah a nih zel chuan nungdamin jail aṭanga a chhuah loh mai a hlauhthawnawm thu, a lawyer Salman Safdar kaltlanga lehkha a tihchhuahah a tarlang a ni. Hetih lai hian sorkar lam thuneitute chuan Khan hi kartin doctor-ten an enfiah ṭhin thu leh, a hriselna lam pawh a ṭhat thu an sawi ve thung.

Kum 2022, April 10-a no-confidence vote hmanga prime minister a nihna aṭanga paihthlak a nih hnuah, Khan hi thubuai 100 chuang siamsak niin, a thubuai eng emaw zatah thiam loh chantir a ni tawh. Kum 2023 August thla aṭang khan jail-ah a tang a, nikum kha a nupui, Bushra Bibi pawh a tang ve leh bawk. Khan thubuai an siamsak hrang hrang, eiruk thubuai aṭanga PM a nihna anga thilpek a dawnte an hralh chhawng leh nia puhna chu thudik lo a ni tih sawiin, politics thila inbeihna niin a sawi.

Jail-a a tan hnuah a hriselna dinhmun a ṭha tawk lo niin a chhungte chuan an sawi fo a, thuneitute an ngaihsak loh avangin a mit dinglam pawhin khua a hmu ṭha tawh lo niin nikum khan a chhungten an tarlang.

Imran Khan chuan a lehkhathawnah, doctor-ten thluaka thisen zam chat leh heart attack a neih theihna a sang hle tih sawiin, a lung pawh a ṭha lo tih a sawi bawk. A nupui, Bibi pawhin April thla khan a mit ṭha lo avangin zai a ni a, hma a sawn loh avangin zai nawn leh a nih loh chuan a mit a del mai a hlauhthawn thu a sawi bawk. A tan mekna, Rawalpindi-a Adial Jail-ah chuan a cell-ah ni k hatah darkar 22 khung hran a nih thu leh, a chhungte tlawh an phalsak lo a, lehkhabu leh TV pawh pek a ni lo tih a sawi. Hetianga hrehawm taka khung hran a nih hian a rilru lam thleng pawha a nghawng thu a sawi bawk a ni.