Netherlands-ah bird flu leng vangin ar 90,000 suat dawn

Netherlands rama Waadhoeke munipality huam chhung, Tzummarum-a broiler farm-ah bird flu, H5N1 hmuh a nih avangin he farm-a ar vulh lai 90,000 suat a ni dawn tih Agriculture, Fisheries, Food Security and Nature Ministry chuan a puang.

Ministry chuan farm-ah bird flu vei hmuh a nih hnuah farm aṭanga km 10 bial chu restrction zone-ah puan nghal a nih thu a tarlang. Farm dangah hri hi a darh em tih enzuiin, contact tracing pawh neih mek a ni. Hei bakah bird flu hmuhna farm aṭang hian hri hmuh a nih thu report hmain ar leh arsa aṭanga thil siamte thawn chhuah a ni em tihte pawh chhui chian a ni dawn bawk.

Netherlands ramah hian hun rei vak lo aṭang khan bird flu hi a leng fo a ni. Gelderland-a farm palia ar 250,000 vel chu suat an lo ni tawh bawk a ni. Hei vang hian October 28 aṭangin ram pumah hri darh tur venna atan kaihhruaina pawh siam a ni. Ar vulhna hmunte chu thil pawimawh tawp a nih loh chuan midangin tlawh loh tur tih te, ar vulhna hmunte pawh fai leh thianghlim taka enkawl a, registration pawh ṭha taka ti tura hriattir an ni.