China Persident Xi leh Russia President Putin-te inkawm

China president Xi Jinping leh Russia president Vladimir Putin-te chu nimin khan Shenzen, China-a Asia-Pacific Economic Cooperation (APEC) summit neih kar lakah an inkawm. Xi, Putin leh USA president Donald Trump te chuan vawiin hian meeting an nei dawn bawk a ni.

Xi leh Putin te hi kuminah ṭum nga an inbiakna an nei tawh a ni. China president Xi chuan Russia president Putin chu a ṭhianṭha leh ṭhian hlun tak a nih thu a sawi. Nimina an meeting hian darkar hnih chuang a awh a, an thu sawi dun zingah economy lama ram pahnihte tawh dunna zau leh nghet zawk siam dan turte a tel. Ukraine leh North Korea chungchang pawh an sawi dun bawk.

Donald Trump chuan Xi leh Putin te nen meeting nei turin nimin khan Philippines aṭangin China a pan a ni. Putin chuan nimina APEC summit-a thu a sawiah, Xi leh Trump te nena meeting an neih turah hlawkna ṭha tak an hmuh ngei a beisei thu a sawi. Tunlai khawvel dinhmun thlirin, inpumkhatna ṭha neih a ṭul thu a sawi.

APEC summit vawi 33-na hi nimin khan ṭan niin, vawiinah an nei chhunzawm ang. Hemi hma hian APEC CEO summit chu neih a lo ni tawh bawk. China-in APEC leader meeting a thlen vawi thumna niin, kum 2001-ah Shanghai leh 2014-ah Beijing-ahte neih a lo ni tawh a ni. Kumin summit-ah hian thupui atan "Building an Asia-Pacific Community to Prosper Together" (Hmasawn tlang tura Asia-Pacific khawtlang din ) tih hman a ni.