US sorkar khar chhunzawm zel

Kum 2018 December 22 aṭanga hna thawk thei loa US sorkar khar (shutdown) chu inremna an la siam theih loh avangin nimin thleng khan khar chhunzawm a la ni a, President Donald Trump-an US-Mexico ramri hungna bang siamna tura sum a la phut chhunzawm avangin hun a la duh rei maithei nia ngaih a ni. 

President Trump-an ramri hungna bang siamna tura dollar tluklehdingawn 5 a phut belh chu Congress-in a pawmpui theih loh avangin sorkar hi khar a ngai a ni. Nilaini khan Congress hruaitute leh President Trump hian meeting nei mah se inremna an la siam thei lo a, vawiin hian inbiak chhunzawm leh an tum. 

Nilainia meeting-ah hian Democrats lam chuan President hnenah shutdown a tihtawp loh chhante sawifiah turin an phut a, Senate Minority Leader Chuck Schumer chuan president insawifiahna hi a ṭha tawk loa an ngaih thu a sawi. 

President Trump chuan ramri hungna bang siam chu thil pawimawh tak, ngaihthah theih a nih loh thu meeting neih hmaa chanchinthar lakhawmtute a kawmnaah a sawi a, an ram mipuite pawhin a ngaihdan chu a dika an ngaih a rin thu a sawi bawk. Hei vang hian shutdown pawh hian a awh rei maithei niin a sawi a ni. 

Trump hian sorkar shutdown hmaa ramri hungna bang siamna atana dollar tluklehdingawn 2.5 dah an rawt chu a pawm lo a, a phut ang zat pe chhuak turin a ti a ni. 

US leh Mexico ramri hungna bang siam hi President Trump hian inthlan dawna a campaign auhlaah pawh a lo hmang tawh a, ramri hungna siam chu dan loa an rama pemlutte venna tur pawimawh tak niin a sawi. Ramri hungna hi Mexico tumtir a nih tur thu a sawi a, mahse Mexico lamin hei hi an pawm theih loh avangin US hian a senso hi a tum vek a ngai dawn a ni. Mahse hei hi Democrats lamin an pawmpui lo a, thil awmze nei lo leh hautak lutuk niin an ngai a ni.