Somalia-in UN palai hnawtchhuak

Somalia sorkar chuan an rama UN palai, Nicholas Haysom chu an ram hruaitu ang maia khawsaah puhin an ram aṭangin a hnawtchhuak. 

Haysom hian hel hlui Islamist Mukhtar Robow thlawptu nawrh huaihawtte thah an nih chungchang sawichhuakin, he thil thleng a dem thu hi a sawi a ni. UN chuan security force-ten nawrh huaihawtte an beihnaah hian mi 15 an thi a, midang 300 vel man an ni bawk niin a sawi. 

Robow hi al-Shabab helpawlah deputy leader a ni ṭhin a, mahse kum 2017 khan helpawl hi a chhuahsan a ni. Nikum October thla khan Somalia-a South West state president thlannaah chuh a tum thu a lo sawichhuak tawh a ni. Mahse sorkar chuan inthlanah hian a chuh ve a remti lo a, December thla tir khan security force-ten an man a ni. Sorkar chuan helpawl thuthlung a la kalsan tak tak lo niin man a nihna chhan a sawifiah. 

UN palai Haysom hian nikum December 30 khan Somalia sorkar hnenah Robow man a nihna chhan leh, amah thlawptute beih an nih chhan sawifiah tur hian a phut a, hei hi sorkarin a chhan leh chhan loh tarlan a ni lo. Mahse  hemi hnu lawk hian UN palai hi an ramah an lawm tawh lo tih an sawilang zui nghal a ni. 

Somalia foreign minis-ter Ahmed Isse Awade chuan Haysom chuan palai hna a thawh danah dan a bawhchhia a, Somalia ram roreltu ang maia a awm thu a sawi. A chetdan chu UN tan pawha thil zahthlak a ni tiin, Somalia ram independence leh rorelna a palzut a ni, a ti.