Bangladesh inthlan sawiseltu journalist man

Bangladesh ram inthlanpui neih zawh takah electronic device hmanga vote thlak danah thil dik tawk lo a awm nia report tu, journalist Hedait Hossain Molla chu man a ni. 

Bangla Tribune and Probabo-a thawk, journalist Molla hian Khulna 1 constituency-ah voter awm zat register awm aiin vote tla a tam zawk niin a sawi a, hei vang hian Thawhlehni khan Khulna-a Assistant Returing Officer Debashish Chowdhury FIR thehluh bawhzuiin Digital Security Act hnuaiah man a ni. FIR-ah hian Molla bakah tualchhung chanchinbu tana thawk journalist dang pakhat Rashedul Islam hming pawh ziahlan a ni bawk a, a ni pawh hi man tura tih a ni. 

Inthlanpuiah hian Bangladesh Prime Minister Sheikh Hasina-i party Awami League chuan hnehna changin, inthlan neihna Parliament seat 300-a seat 299-ah Awami League hian seat 288 an la a ni. 

Jail-a tang mek PM hlui Khalida Zia-a kaihhruai Bangladesh Nationalist Party (BNP) chuan seat 5 an la bawk. BNP hian inthlan result hi an pawm loh thu sawiin inthlan ṭhat neih an phut nghal bawk. Eptu party dang Jatiya Oikya Front - National Unity Front leh party tenau dangte pawhin Election Commission-in inthlan a kalpui dan chu an sawisel a, EC chu Hasina-i party duhsak bikah an puh.