Donald Trump-a'n US-Mexico border a tlawh dawn

US President Donald Trump chuan vawiin hian US chhim lama US-Mexico ramri a tlawh dawn. Hei hi ramri hungna bang siamna tura a sum phut Congress in a pawm theih loh avanga ni 16 chhung hnathawk thei loa sorkar khar (shutdown) a nih hnuah Washington a chhuahsanna hmasa ber tur a ni.

 

Republican President hian ramri hungna bang siamna tura a sum phut chungchanga inhnuhdawh a la tum lo a, dan loa an rama lut ṭhinte venna turin ramri hungna bang siam hi a pawimawh tih a sawi reng a ni. Mahse a ngaihdan hi Congress-a Democrats lamin an pawmpui thei lo a, House Speaker thar Nancy Pelosi chuan ramri hungna bang siam chu thil awm lo tak niin a sawi. 

Nikum December 22-a sorkar shutdown a nih avang khan President Trump hian Florida a tlawh tum pawh ṭhulhin, US khawpui Washington hi a la chhuasan lo a ni. 

Kum thar hnuah rorel inkhawm neihah US House of Representative thununtu, Democrats-te chuan sorkar agency eng maw zat, hna thawk thei loa shutdown tihtawpna tur dan an pass a, mahse ramri hungna bang siamna tur erawh an la pass lo. Tunkar hian agency te hawn an nih theihna tur bill eng emaw zat an pass chhunzawm leh rin a ni.  

President Trump hian ramri hungna bang siamna tur atan hian dollar tluklehdingawn 5.6 pe turin a phut a, mahse Democrats lamin an pawm sak thei loa ni. Democrats lam chuan ramri hunga siam tum hi a hautak bakah awmzia tak tak a nei dawn lo a, hei bakah America ram hlutna a tihniam zawk dawn niin an ngai.