S. Africa rel chesualah mi pathum thi, 620 hliam

South Africa-a Thawhlehni zinga rel pahnih insuah mi pathumin nunna an chan a, midang 620 velin hliam an tuar.

Rel pahnih insute hi Mabopane aṭanga Pretoria lam pana line inang zawh an ni a, Pretoria-a Mountain View station-ah an insu ta niin Metrorail thupuangtu Lillian Mofokeng chuan a sawi. Rel pahnihah hian mi 800 vel an chuang niin a sawi bawk.

Rel insute hi state enterprise Passenger Rail Agency of South Africa (PRASA) division-a Metrorail an ni ve ve a, Minister of Transport Blade Nzimande pawhin a hmun hi tlawh nghalin PRASA management chu mawhphurtu an nih thu a sawi.

Blade Nzimande chuan security company pawh mawhphurtu an nih ve tho thu sawiin venhimna lamah sum tam tak an seng chungin cable ruk bo a la awm reng tho niin a sawi bawk. Cable ruk bo a awm avangin signaling system lamah harsatna a awm phah niin a sawi a ni.