Syria aṭanga sipai lakchhuak chungchangah

US leh Turkey inrem thei lo China news agency Xinhua chuan, Syria aṭanga US-in a sipaite lakchhuak a tum chungchangah US leh Turkey te chuan inrem lohna dang an neih belh leh niin a tarlang.

US national security adviser John Bolton-a'n Syria aṭanga US sipai lakchhuah hun tur chungchang a sawipuinaah ram pahnih inkarah hian inhmuhthiam lohna a awm niin an tarlang a ni.

Bolton hian US sipai 2,000 vel Syria aṭanga lakchhuah an tumna kawngah hian Turkey chuan US thurualpui Syrian-te chu lo bei lo tura an intiam a ngiat a, mahse Turkey president Recep Tayyip Erdogan chuan Bolton chu thil sual lian tak tiah puhin, US-in an sipaite lakchhuah tuma ruahmanna an siamah chuan thu zep ṭhen a awm niin a puh thung.

US-in Syria-a pawl a thurualpuite hian ISIS ho tawmbuk chu an la bei reng a, mahse Turkey chuan US thurualpuite hi terrorist pawlah puhin anmahni beih nan ruahmanna an siam niin a sawi.

Thla khat dawn liamtaah khan US President Donald Trump chuan Syria-a American sipaite chu lakchhuah an ni dawn tih a sawi a, mahse engtikah nge lakchhuah an nih dawn erawh zawhna a tam hle a ni. Hetihlai hian US-in Syria-a a thurualpui Syrian Democratic Force-te chuan US thutlukna siam chu inphatsannaah an ngaih thu an sawi ve mek bawk a, US-in a sipaite lakchhuah a tumna chu hnunga invih ang a nih thu sawiin, Turkey hlauh vangah an puh ve thung a ni.