Trump-an Mexico ramri a tlawh
US President Donald Trump chuan Ningani khan Mexico ramri a tlawh.
President Trump-an Mexico ramri hungna bang siamna tur sum a phut chu Congress in a pawmpui loh avangin Trump hian national emergency puanah a lo vau tawh a ni.
Trump hian Texas-a Rio Grande Valley-a MacAllen-a border patrol station a tlawh a, US senator pahnih Republican member John Cornyn leh Ted Cruz-ten an ṭawimawm a ni.
Texas a thlen hnuah Trump chuan a Twitter-ah January 21-25 chhunga Davos, Switzerland-a World Economic Forum a tel a tum pawh a ṭhulh thu a sawi a, Democrats lam nena inremna an siam theih loh avanga sorkar shutdown chhunzawm a la nih avangin an ram a chhuahsan thei lo tih a sawi. Ni 20 chhung sorkar shutdown a nih vang hian sorkar hnathawk 800,000 vel zet chuan hlawh an la thei tawh lo a ni.
Trump chuan Demcorats lam nena inremna an siam theih loh chuan a tan national emergency puan mai loh chu thil mak tak a ni zawk dawn tih a sawi. "Hetiang thil ti tur hian ka inpeih lo a, mahse a ṭul a nih chuan ka tih ngei a ngai a ni", tiin a sawi.
President hian ramri hungna bang siamna tur dollar tlukleh-dingawn 5.7 a phut chu a hnukdawk duh lo a ni. Hetihlai hian House of Representatives thununtu, Democrats lam chuan ram hungna siam hi thil ṭullo leh awmze nei lo niin an ngai a, president sum phut hi an pawmpui duh lo a ni. Democrats lam chuan ramria venhimna ṭha zawk kalpuina turin dollar tluklehdingawn 1.3 an pek theih tur thu an sawi a, mahse hei hian bang siamna tur a huam tel lo. Hei hi President Trump hian a pawm thei lo a ni.
Ningani khan House hian kar thum chhung hnathawk mumal thei loa awm tawh, Agriculture leh Transportation department bakah agency dangte hnathawk thei tura hawn chhunzawm an nih theihna turin bill pahnih an pass leh a ni.
Democratic Congresswoman Grace Meng chuan President Trump-an national emergency a puan tum lo danna tur dan chu House-ah pharh a ni dawn tih a sawi. House member ṭhenkaht chuan national emergency hi puan a nih chuan President chu khin let an tum thu an sawi a, mahse Trump chuan hemi tur hian a inpeih tur leh, hnehna a chan ngei tur thu a sawi.