Pakistan leh Saudi Arabia-in dollar tld 10 hu MoU ziak dawn

Pakistan leh Saudi Arabia chuan dollar tluklehdingawn 10 chuang hu thawhdunna tur, memorandum of under-standing (MoU) an ziak dawn. 

Ram pahnihten MoU an ziah tur thu hi Islamabad-a Pakistan Prime Minister Imran Khan kaihhruai Ease on doing business (EoDB) meeting vawi hnihna neih ṭumin puan a ni. 

Pakistan Finance Mini-ster Asad Umar chuan thla tharah Saudi Prince Mohammad bin Salman bin Abdulaziz chuan Pakistan a tlawh dawn a, hemi hunah hian MoU tam zawk hi ziahfel tum a ni tih a sawi. Board of Investment (BoI) Chairman Haroon Sharif chuan Saudi Arabia hian sector pali - oil refinery, petrochemicals, renewable energy leh mining lamah Pakistan thawhpui a duh niin a sawi bawk. 

Sharif chuan Saudi Arabia in investment a tih tur zinga 65% hi Karachi-ah a ti dawn a, a bak 35 chu Lahore-ah a ni dawn tih a sawi. Dollar tluklehdingawn 10 investment a tih tur hi nikum October thlaa Imran Khan-an Saudi Arabia ram a tlawh ṭuma an ram leiba laka khaichhuahna tur dollar tluklehdingawn 6 an pek bakah an belh leh tur a ni. 

Pakistan hian thla hnih chhungin China, United Arab Emirates (UAE) leh Malaysia-te chu MoU a ziahpui leh dawn bawk. Sharif hian tunhnaiah China tlawhin, China-Pakistan Economic Corridor (CEPC) hnuaia industry lama thawhdunna tur MoU pawh an lo ziak tawh bawk a ni.