Bolivian opposition senator Jeanine Áñez-in President lailawkah a inpuang

Bolivia president aṭanga Evo Morales a ban hnuah,  opposition senator Jeanine Áñez chu Bolivia Constitutional Court thlawpnain president lailawkah a inpuang.

Áñez chuan an ram danpui hnuaiah president ni tur a nih thu sawiin, inthlan buatsaih vat a tiam. President lailawk atana a inpuanna hi Constitutional Court pawhin a pawmpui nghal a ni. President Evo Morales chuan Pathiannia a banna a thehluh hnu khan Thawhṭanni khan Mexico lam a pan nghal a, hemi hnu lawk hian Jeanine Áñez chu president lailawkah a inpuang zui a ni. Morales hian a banna a thehluh hnu khan a nunna chu a him lo tih sawiin, Mexico-ah hian inhumhimna zawnga a kal thu a sawi.

Áñez hian Thawhlehni aṭang khan Senate a thunun zui a, "Chamber of Senators president ka nih angin, ram danpuia inziak angin President dinhmun hi ka luah zui nghal a ni," a ti. Bolivia hi October thla khan an inthlang a, hetah hian president ni lai Evo Morales chu thlantlin leh a ni. Mahse eptu lam chuan inthlanna a felfai lo tih sawiin, lungawi lohna nasa takin an lantir chhunzawm a, hun eng emaw chen tualchhung buaina an tawh hnu­a sipaiten bang tura an ngen angin Morales hi a bang ta a ni.