Israel sipai leh Palestian-te inbeih chhunzawm

Israel sipaiten Thawhlehni zinga Gaza Strip-a beihpui an thlaknaah Palestinian group, Islamic Jihad commander Bahaa Abu al-Ata leh a nupui an thi a, hemi hnu hian Palestinian lam hian rocket hmangin Israel chhim lam chu nasa takin an bei let ve nghal. 

Rocket hmanga beihna hi Israel sipaite pawhin an chhang chhunzawm ve nghal a, Gaza city chu ṭum eng emaw zet thlawhtheihna hmangin an bei. Israel sipaiten Gaza City an beihnaah hian Palestinian mi 12 an thi niin health official-te chuan an sawi. 

Israel sipai leh Palestinian group-te inbeihna avang hian nimin aṭang khan Gaza Strip-a university-te chu khar a ni a, United Nations agency enkawl school-te pawh khar rih a ni bawk. Rocket hmanga beih an nih vangin, Israel Basketball Association (IBBA) chuan games 136 neih hun tur a sawn hlat phah. Basketball games bakah cultural, enterntainment leh sports event dang neih turte pawh sawn hlat an ni bawk a ni.