Nawaz Sharif-a'n Pakistan sorkar thil phut pawm lo

Pakistan prime minister hlui, Nawaz Sharif chu Pakistan sorkarin inenkawl tura ram pawn lama a zinchhuah a phalsak hnu­ah, a zinchhuah theihna tura sor­karin a laka thil a phut chu a hnawl. 

Pakistan cabinet meeting, Thawhlehnia neih chuan PM hlui Sharif hi  in enkawl tura United Kingdom (UK)-a zin remtiin, ram pawn lama zinchhuak khapsak, no-fly list aṭangin a hming pawh paih a ni. Hemirual hian Sharif lakah hian intiamkamna bond cheng vaibelchhe 700 hu ziak turin an phut thung. 

Hei hi a inenkawl zawha Pakistan rama a kir leh a, eiruk thubuai a neih mekte a hma­chhawn chhunzawm leh theihna tura ti an nih thu an sawi. Hemi chungchang hi Sharif chuan dan kalh a nih thu leh thil dik lo a nih thu sawiin, a damloh inenkawlna kawnga politics a inrawlh chu ṭha a tih loh thu a sawi. Sharif-a party Pakistan Muslim League-Nawaz (PML-N) hotu Atta Tarar chuan intiamkamna bond chu court pahnihah Sharif hian a thehlut tawh thu leh sorkara thehluh kher hi a ṭul tawh loh thu a sawi ve bawk.  

Prime Minister hlui Sharif hi term thumna a chelh lai, kum 2017 khan paihthlak a ni a, a hnuah eiruk thubuaiah thiam loh chantirin jail-ah dah zui a ni. Jail-a a awm chhung hian a hriselna ṭhat tawk loh avangin, damdawiinah October 22 khan dahlut a ni a, in lama inenkawl zui turin kar liam ta khan lakchhuah a ni. 

A hriselna hian ziaawm lam a pan mai loh avangin, doctor thurawn angin United Kingdom lama in enkawl zui turin sorkarah an dil a, a dilna hi pawmsak a nih hnuah intiamkamna bond sorkar a ziahpui theih loh avangin, Pakistan hi a chhuahsan thei dawn em a la chiang lo.