Brazil president-in political party thar din

Brazil president Jair Bolsonaro chuan Thawhlehni khan social network kaltlangin a awmna ṭhin party, Social Li­beral Party (PSL) a chhuahsan thu leh, political party thar a din thu a puang.

President Bolsonaro chuan hemi chungchang hi a twitter-ah tarlangin, PSL chhuahsanin party thar a din thu a sawi. PSL-a awm chhunga a thawh­pui te leh, kum 2018 inthlana a thawhpuite chungah lawmthu a sawi nghal bawk. 

Bolsonaro hian kum 2018 inthlan dawn khan president a chuh duh vangin PSL hi a zawm a ni. PSL hian House of Representatives-ah member 53 neiin, party zingah member nei ngah ber dawttu a ni a, senator pathum a nei bawk. 

President leh PSL founder Luciano Bivar inkar hi a ṭha lo hle nia sawi a ni. Thla hmasa lawk pawh khan hruaitu pahnihte hi ṭawngkam mawi lo takin an inchhang a ni. Bivar hian party hruaitu hna hi Bolsonar leh a fate kuta hlan a duh lo nia sawi a ni. 

November 21 hian Presi­dent party din thar hian meeting an nei dawn a, party kalphungte leh hma lak zel dan turte an ngaihtuah ang. Party thar hming  hi official-in la puang lo mah se, Movimento pelo Brasil 

(Movement for Brazil) tih a ni dawn nia sawi a ni bawk. House of Representatives-a PSL member tam zawk chuan president hi an zui rin a ni. 

Hetihlai hia party thar din tur hian Bolsonaro hian amah thlawptu mi 500,000 signature a neih a ngai a, mahse hei hi social media kaltlang pawhin awlsam taka a neih theih a beisei tih a sawi.