Israel leh Gaza-ten inkahhai puang

Ni hnih chhung nasa taka an inkah hnuah Israel leh Gaza-a Islamic Jihad group chuan nimin khan inkahhai an puang.

Israel-in Thawhlehnia beihpui an thlaknaah khan PIJ commander Baha Abu al-Ata chu a thi a, hemi hnu hian Israel leh Gaza Islamic Jihad group inkarah hian buaina a chhuak zui. Israel chuan Baha Abu al-Ata hi Gaza aṭanga rocket kahchhuah tam taka mawhphurtu a nih thu an sawi a ni.

Hemi avang hian Israel leh Gaza-a  Islamic Jihad group chu nasa takin an inkap zui a, thi pawh an tam hman hle. Nilaini zan khan Israel air strike-ah Palestine mi chhungkaw pariat an thi niin Palestinian thuneitute chuan an sawi. 

Gaza health ministry chuan thi zawng zawng hi civil mi an nih thu sawiin, naupang leh hmeichhiate pawh an tel tih an sawi a, Israel lam erawh chuan rocket unit head PIJ commander Rasmi Abu Malhous an thah thu an sawi ve thung.

Palestine mi 32 chu he inbeihnaah hian an thi a, Israel chuan thi zingah 20 hi chu firfiak an ni tih an sawi. Israel lamah pawh hliam eng emaw zat an awm bawk. Palestinian Islamic Jihad (PIJ) firfiak pawlte chuan Israel lamah hian rocket 400 aia tam an kap chhuak tih Israel sipaite chuan an sawi.