US-in Bolivia interim president thlawp

Bolivia president aṭanga Evo Morales a ban hnua interim president-a inpuang, Jeanine Anez chu US chuan thlawpin, Bolivia hruaitua a pawm thu a sawi. 

US Secretary of State Mike Pompeo chuan thuchhuah siamin, Bolivia ramin hun harsa tak a tawh laia senator Jeanine Anez-in an ram dinhmun siamṭhat a nih theihna atana interim president atana a inpe chu lawmawm an tih thu leh, hei hi an thlawp thu a sawi.  

Kum 52 mi, Jeanine Anez chuan Bolivia interim president-a a inpuan hnuah, inthlan buatsaih thuai a nih tur thu a sawi nghal bawk. Anez hian interim president a nihna chu dan ang taka kalpui a nih theihna turin session a ko nghal a, mahse Morales thlawptute chuan session hi an boycott thung. 

Hetihlai hian president aṭanga a ban hnua Mexico rama tlanchhia, Evo Morales chuan US thiltih chu a dem thu a twitter-ah a sawi. US chu Bolivia ram phiarruah a puh zui bawk. Eptuten an pawm loh, October inthlana thlan tlin a nih dan chu thil dik tak nia sawiin, hemi chungchangah hian United Nations chu inrawlh turin a ngen. 

Morales hian Pathianni khan president a nihna aṭangin a ban thu a puang a, hemi hnu hian a nunna a derthawng nia sawiin Thawhlehni khan humhimna pe theitu tur, Mexico ramah a tlanchhia a ni. Mahse Mexico ramah hian awmhlen a tum lo tih sawiin, Bolivia ramah a theih anga hmaa kir leh a tum tih a sawi.