Australia ramkang Hmun him lama inthiar chhuak turin hriattir

Kar liam ta aṭanga kang ṭan, Australia khawchhak lama ram kang chuan ziaawm lam a la pan thei lo a, kangmei laka mipuite him zawk nan Australia thuneitute chuan kangmei ina a kankai mai theih bula awmte chu inthiar chhuak turin an hriattir. 

Kangmei chhuah chhan hi tlangval kum 20 miin thil a hal aṭanga inṭan niin police-te chuan an sawi. Police-te'n he tleirawl hi an man hnuah bail-a chhuah leh a ni. December 3 ah a thubuai hi court-ah ngaihtuah zui a ni ang.

A tirah chuan thingkung 150 bawr vel a kang nia sawi a ni a, mahse kangmei hian ziaawm lam pan loa a kankai belh zel avangin tunah chuan kangmei inṭanna state, New South Wales (NSW) leh Queensland-ah ringawt pawh ram hectare makataduai 1.1 a kang chhe tawh a, he state pahnihah hian emergency puan zui a ni bawk. 

Australia ramah hian nipui a  in her ve dawn chauh a, December aṭanga February thla hi an nipui a ni. Hei vang hian Australia ram hian khaw lum lam a pan ve zel bawk. Khua a ro vang te, thil lum vangte leh tui tlem vangin ram kang hian ziaawm lam a pan hlei thei lo niin  thuneitu lam chuan an sawi. 

Nipui laia thingkung kang hi Australia ramah chuan thil thleng fo a ni a, kumin hian kangmei avang hian ram acre maktaduai 2.5 a zau a kang tawh a, mi pathumin an thih phah tawh bawk. Kumina ram kang tuar nasa bertu chu NSW leh Queensland state-te hi an ni a, he state-ah hian kum thum bawr vel chu khawkeng an tuar tawh a ni.