Lebanon PM atan Mohammad Safadi rawt

Lebanon-a political party lian pathumte'n finance minister hlui, Mohammad Safadi chu sorkar thara an ram prime minister atan an rawt.

Ningani khan prime mi­nister bang ta Saad al-Hariri, Sunni party, Amal party leh Hezbollah political party-te ṭhukhawm chuan he rawtna hi an pawm a ni. Safadi leh a kaihhruai Future Movement political party-te chuan PM atan rawt a nih thu engmah thuchhuah an siam lo thung. 

Sorkar lakah lungawi lohna lantir a nih hnuah, October 29 khan PM nilai Hariri chu  PM aṭangin a bang a ni. Hariri hian caretaker prime minister hna a la thawk chhunzawm tho a ni. PM atan an rawt Safadi hi sumdawnglian a nih bakah, kum 2011-2014 chhung khan prime minister Najib Mikati hnuaiah finance minister a lo ni tawh. Prime minister Fouad Siniora hnuaiah pawh economy and trade minister hna a lo chelh tawh bawk.

Lebanon-a sorkar laka lungawilohna lantir a nih chhan hi, October 17 khan sorkar chuan WhatsApp call-ah chhiah lak a nih tur thu a puang a, hemi duh lohna avang hian mipuite chuan sorkar laka lungawi lohna hi an lan tir 

ṭan a ni. 

Nawrh huaihawtte hian an ram politics kalphung chu nasa takin an sawisel a, an rama hmasawnna ruhrel chhe lutuk vang te, eirukna hluar vang te, sorkar funding hman khaw loh avang leh unemployment rate sang vang tein sorkar lakah hian lungawi lohna an lantir a ni.