Venice-ah tuilian vangin emergency puang

Italy sorkar chuan Ninga­ni khan tuilian avangin Venice-ah emergency a puang. 

Prime minister Giuseppe Conte hoa cabinet an ṭhut khawm hnuah, emergency hi puan zui a ni. Meeting hian Venice-a tuilianin a tihchhiatte siamṭhat nan euro maktaduai 20 dah an remti nghal bawk. Tuilian hian Venice-a Unesco world heritage site ṭhenkhatte chu a chim bakah, museum, art gallery, in leh sumdawnnate a tichhe tel bawk. Conte chuan he chhiat tawhna hi ram tan chuan a lungchhiat thlak hle thu a sawi. 

Kumina Venice-a tuilian hi kum 50 chhunga tuilian an tuar nasat ber a ni. Tuilianin thil a tihchhiat hlut zawng hi euro maktaduai tel fe a nih thu Venice mayor Luigi Brugnaro chuan a sawi. He tuilian hi khawvel sik leh sa inthlak danglam vanga lo thleng a nih thu Brugnaro chuan a sawi bawk.

Venice hian tuilian a tuar fo avangin tuilian laka invenna tur, kum 2003 aṭanga sak ṭan tawh project lian­ tham tak mai, "MOSE Project" hnathawh kal lai mek chu a tikhaihlak a ni. He project hi vawi tam tak hawn thuai a nih tur thu  thuneitu lam chuan lo sawi tawh mah se, eirukna, pawisa hman ngai tam lutuk leh environmentalist hoin an dodal avangin tihkawtlai  a ni. Italian Transport and Infrastructure Minister Paola De Micheli chuan he project hi kum 2021-a hawn a nih tur thu a sawi.

Venice hi Italy hmar­chhak lama awm a ni a, island te reuh te te 118 inzawm khawm a ni. 'Adriatic Sea' kama awm a ni.