Myanmar-a Rohingya-te beih dan ICC-in chhui chian a remti

International Criminal Court (ICC) chuan Myanmar-a Rakhine state-a Rohingya Muslim te beih an nih dan te, an laka pawikhawihna thlen a nih dante chhui chian a remti. 

Kum 2017-a Myanmar sipaiten border post beih a nih hnua Rohingya helte laka beihpui an thlak khan, Rohingya civil mite beih tel niin mi nuai sarih chuang zet chu Bangladesh ramah an tlanchhiat phah a ni. Rohingya-te hian sipaite kut an tuar nasa hle nia sawi a ni a, mi tam tak thiin an in leh lote halsak an ni a, United Nations investigator-te chuan hnam insuatna ang hiala ngaih theih anih thu an lo sawi tawh bawk. Sipaite chetdan avang hian ram hrang hrangten Myanmar sorkar hi an sawisel nasa hle a ni. 

Hague-a ICC hi kum 2002 khan din niin, khawvela pawi­khawihna rapthlak leh liantham thleng chungchang ngaihtuah tura tih a ni. ICC-in Rohingya-te chunga thil thleng chungchang chhui chian a remti chu lawmawm an tih thu  Save the Children-a  Director of Children and Armed Conflict George Graham chuan a sawi. Rohingya hnam­te laka Myanmar sipaite pawi­khawihna thlengte chu chhui chian a ngai hle a ni, a ti. 

Myanmar hi ICC member a ni lo a, mahse nikum khan court chuan Rohingya-te tlanchhiatna leh tun thlenga an la awmna, Bangladesh chu ICC member a nih avangin hemi chungchang hi ICC hian a rel thei tih a lo sawi tawh a ni.