Sri Lanka president thlanaah Rajapsaksa-a'n hnehna chang

Sri Lanka president thlanna, kar kal ta Inrinnia neihah eptu candidate, defence secretary hlui Go­tabaya Rajapaksa chuan hnehna a chang. Election Commission chairman Mahinda De­shapriya chuan Inrinnia inthlan neihah khan vote nei mi maktaduai 15.99 zinga 80% in vote an thlak tih a sawi. 

Rorellai party candi­date, housing minister Sajith Premadas chuan a chak loh a pawm thu leh, mipuite duhthlanna chu a pawm thu a sawi tawh a ni. Rajapaksa thupuangtu, Keheliya Rambukwella chuan Gotabaya Rajapaksa hnehna chan chu Sri Lanka mipuite tana hnehna a ni tiin, a policy-te chu mipuiten an dawngsawng ṭha hle tih a sawi. Rajapaksa'n hnehna a chang tih an hriat hnu hian, amah thlawptu mi tam tak chu Colombo khawpui daia Rajapaksa chenna in kawtah an pungkhawm nghal bawk. 

Gotabaya Rajapaksa hi kum 2015-a paihthlak, prime minister Mahinda Rajapaksa unaupa a ni. Inthlan dawna a campaign auhlaah pawh thlan tlin a nih chuan a unaupa chu prime minister-a dah let a tiam. An ram security thuam chak te, tualchhung indo thlen laia human rights palzuta a puh sipai commander mante ngaihdam te a tiam bawk a ni.