Nawaz Sharif-a'n London a pan dawn

Pakistan prime minister hlui Nawaz Sharif chu in enkawl turin naktuk hian London a pan dawn nia sawi a ni. Sharif hi a hriselna ṭhat tawk loh avangin jail aṭanga la­chhuakin Lahore damdawiinah hun eng emaw chen enkawl a ni a, mahse doctor-te chuan ram pawn lama enkawl turin thurawn an pe a ni. Hetihlai hian Sharif hi Pakistan sorkarin rampawna zinchhuah a khapsak,  Exit Control List (ECL) ah a tel avangin phalna nei loin an ram a chhuahsan thei lo a ni. 

Doctor-ten ram pawn lama enkawl a ngai nia an sawi  hnuah, Pakistan sorkar chuan a zinchhuah theih nan no-fly list aṭangin Sharif hi hming paih a, kar li chhunga inekawl tura a zinchhuah a phalsak a, hemi rual hian intiamna siam a,  Pakistan pawisa cheng tluklehdingawn sarih chuang dahkham turin a phut thung. Hei hi Sharif chuan a hnawlsak. 

Hemi hnu hian Lahore High Court chuan Inrinni khan Pakistan sorkar hnenah Sharif hi thu delhkilh engmah awm loa ECL aṭanga a hming paih turin a hriattir a, hemi  hnu hian Sharif-a party, Pakistan Muslim League-Nawaz thupuangtu Marriyum Aurangzeb chuan London lamah kal a tum thu hi a sawi ta a ni.