Zimbabwe president-in damdawiin sak thar hawng
Zimbabwe President Emmerson Mnangagwa chuan kar kal ta Inrinni khan Mashonaland East Province-ah, damdawiin sak thar Mahusekwa Hospital Phase II a hawng.
He damdawiin hi China leh Zimbabwe inṭhianṭhatna tihlan nana sak a ni a, China hian a sakna senso hi a tumsak a ni. Kum 2006 khan China-Africa Forum chu Beijing-ah neih a ni a, hetah hian China chuan an inṭhianṭhatna nemngheh nan Zimbabwe-ah hian damdawiin sak hna a rem ti ta a ni.
Mashonaland East Province hi Zimbabwe hmarchhak lama awm a ni a, he hmuna damdawiin Mahusekwa Hospital Phase II hawn hian helai vela mihring cheng 70% chu a huam tel thei dawn a ni. He damdawiin hian ram a awh zau zawng hi 5,220 square meter a ni a, mithi dah lailawkna in, puan sukna room, disinfection room leh thil dang dangte dah a ni bawk.
President Mnangagwa chuan he damdawiin hawn thar hi Zimbabwe leh China inthianṭhatna hlawhtlinna lantirtu anih thu sawiin, "Kan rama cheng mipuite hi he damdawiin kaltlang hian a hma aiin an hrisel tawh zawk dawn a ni," a ti.
Kum 2012 khan Mahusekwa Hospital Phase I zawk chu zawh fel a ni tawh a, hei pawh hi China chuan a senso tumin, Zimbabwe sorkar lakah a hlan fel tawh a ni.