Israel-in rocket pahnihin Gaza-ah kap leh
Israel chuan kar kal ta Inrinni khan Gaza Strip-a kum 2007 aṭanga rorel lai, Palestinian militant organization Hamas-te beih nan rocket pahnih a kap leh.
Kar liam ta Ningani khan Israel leh Gaza-a Islamic Jihad group chuan inkahhai puang tawh mah se, inbeihna hi a la reh chuang lo niin a lang. "Gaza lam hawia rocket pahnih kan kap chhuak hi nidanga beihpui kan thlak ang a ni lo a, Islamic Jihad pawlte kah tum kan ni lo. Hamas zawkte bei kan ni," tiin Israel sipai thupuangtu chuan a sawi.
Anni huna Inrinni zing lam dar 2 khan Gaza strip-a Hamas awmna hmunah rocket pahnih an kah thu Israel sipaite chuan thuchhuah an tarlang. Kar kal ta Thawhlehni khan Israel sipaite chuan Gaza Strip-ah beihpui an thlak a, hetah hian Palestinian group, Islamic Jihad commander Bahaa Abu al-Ata leh a nupui an thih thu tarlan a ni. Hemi hnu hian Palestinian lam hian rocket hmangin Israel chhim lam chu nasa takin an bei let ve nghal bawk. Ni hnih chhung nasa taka an inbeih hnuah kar liam ta Ningani khan inkahhai an puang a ni.
Ni hnih chhung inbeihnaah hian Palestinian mi 35 an thih thu tarlan a ni a, chung zinga mi 19-te chu firfiak an nih thu leh a dang zawng chu civil mi an nih thu tarlan a ni. Thi zingah hian hmeichhia pathum an tel nia sawi a ni bawk.