Thailand lal sawiseltu kum 43 tang turin hrem

Thailand court chuan nimin khan an ram lal sawiseltu, civil servant hlui chu lal chhungkaw sawisel khapna dan a bawhchhiat avangin kum 43 leh thla ruk tang turin a  hrem. 

Bangkok Criminal Court-in hremna a pek hi hmeichhia niin a hming hi Anchan ti chauhin sawilan a ni a, kum 60-70 inkar ni a sawi a ni bawk. Facebook leh Youtube lamah lal rorelna sawiselna lawm hawi audio clip a post avangin lese majeste law bawhchhia puhna thubuai 29-ah thiam loh a chantir a ni. Court hian a tirah chuan kum 87 tang turin a hrem a, mahse a tihsualte hi a pawm thu a sawi avangin a hremna hi tinepin, a chanveah a tihhniam sak leh ta a ni.  Court thutlukna hi human rights group hrang hrangte chuan na takin an sawisel zui nghal. 

Thailand-a lal humhalhna dan, lese majeste law, Article 112-a hriat lar bawhchhiate hi kum 3-15 thleng tan tir theih an ni. Facebook-a post lo like ringawt te pawh hrem theih an ni a, complaint hi tupawhin an thehlut theih bawk avangin he dan hian sawisel a hlawh hle. Nikum November thla aṭang khan lese majeste law bawhchhiaa puh mi 50 vel man an ni tawh.