Venezuela president term hnih-na chelh turin Maduro lalut

Venezuela President Nicolas Maduro chu president term hnihna chelh turin Ningani khan Supreme Court of Justice (TSJ) president Maikel Moreno chuan rinawmna thu tiamtirin a lalut. President term hi kum ruk chhung a ni.

Nicolas Maduro chuan Venezuela mipuite aiawhin ram hruaitu atana lakluh a nih thu a sawi a, an ram danpui humhim tur leh tihhlawtling turte, an ram himna leh thuneihna humhim turin theihtawp a chhuah dawn tih a sawi.

 

Lakluh inkhawm zawh hnua thu a sawiah, President chuan an rama remna leh muanna a awmna tura hmasawnna a nih thu a sawi a, Venezuela chu democracy ram dik tak a ni, a ti. 

President thar lakluh inkhawmah hian an ram hruaitute bakah, ramdang 94 aiawhte an tel a ni. An zingah hian Bolivia President Evo Morales, Cuba President Miguel Diaz-Canel, Nicagarua President Daniel Ortega leh El Salvador President Salvador Sanchez Ceren-te pawh an tel.