Covid-19 kai damte'n Midangte ṭanpui let
Coronavirus (Covid-19) kai, enkawl dam tawh mi 20-te chuan Wuhan khuaa he natna hri kai zinga damlo nasa zualte tan an thisen an donate tih Covid-19 scientific research team-te chuan Pathianni khan an tarlang.
Thisen pe tute hi doctor leh nurse-te an ni a, anni hian he hri leng hi an kai ve tawh a, mahse uluk taka ni 10 chhung Wuhan-a Jiangxia First People's Hospital leh Chinese medicine hospital-a enkawl zui an nih hnuah an dam a ni.
Ni thum chhung chu a zawnin China-ah hian Covid-19 hri kai hi a punna a tlakhniam thu thuneitute chuan an sawi. Kar liam ta Inrinni tlai khan Shanghai-ah chuan he hri kai mi 124-te chu an dam thu leh damdawi-in aṭanga chhuah an nih thu thuneitute chuan an tarlang. Heng zinga mi 14-te chuan hri kaite tan an thisen donate an duh thu an tarlang ve bawk.
Nimin thleng khan Covid-19 vanga thi hi China ramah mi 1,770 an awm tawh a, a kai finfiah tawh hi mi 70,548 an tling. He hri vei enkawl dam, damdawi-in aṭanga chhuah tir tawh hi mi 10,844 an tling tawh bawk a ni.
Khawvel economy-ah nghawng a nei thei : IMF Managing Directo Coronavirus hri leng vang hian khualzin (tourism) lamah leh inkalpawh tawnna (transportation)-na lamah nghawng a neih avangin, kumina khawvel economy ṭhanna tur chu a tlakhniam phah theih thu International Monetary Fund (IMF) Managing Director Kristalina Georgieva chuan a sawi.
Dubai-a Global Women's Forum hmannaah Kristalina Georgieva chuan Covid-19 chungchang hi sawichhuakin, he hri leng vang hian mi 1,700 chuang an thih tawh bakah, kumin January thlaa World Economic Outlook-in a tarlan tak khawvel economy ṭhanna tur 3.3%-a a beisei chu sawi chhuak bawkin, ṭhanna tura beisei hi hri leng vang hian 0.1-0.2%-in a tlakhniam theih thu a sawi a ni.
"Khawvel economy tlak hniam mai theih thu ka sawi hi, ka sawi hma viau pawh inti ti maithei a, mahse mipuite hnenah he hri leng hian khawvel economy a nghawng thei tih hriattir ka duh a ni. He hri hian engtin nge khawvel a nghawng chhoh zel dawn kan hre lo.
Tunah pawh hri leng hian tourism leh transportation lamah nghawng a neih thu kan hre nghal tawh a, hei hian ei leh barah harsatna a thlen thei a ni," tiin kalkhawmte hmaah Georgieva chuan a sawi.