Hong Kong Police leh nawrh huaihawtte inbei

Hong Kong Polytechnic University-a nawrh huaihawtte leh police-te chu nimin zing khawvar hma khan an innawr buai.

Polytechnic campus chhungah nawrh huaihawtte hi ni eng emaw zat an inkulh tawh a ni. Pathianni zan khan Hong Kong police-te chuan campus hi an hual a, nimin zing khan campus chhung chu luhchilhin nawrh huaihawtte hnawhdarh hna hi an thawk a ni. 

Nawrh huaihawtte hi police-te chuan mittui tlakna hlo leh tuia phuhin hnawh darh tumin an bei a, campus chhunga awmte hian gasoline bomb hmangin police leh an motor te chu an lo bei let ve bawk. Campus chhunga awmte hian police lut tur danna atan hian lei an hal zui bawk a, inhliam pawh an awm nual nia sawi a ni.  Bungrua leh thil dang a kang chhe nual bawk. 

Kumin June thla aṭang khan Hong Kong sorkar laka lungawi lohna lantirin nawrh hi huaihawt ṭan a ni. Hong Kong-a cheng, thiam loh chantir tawhte mainland China-a thawn an nih theihna tur bill, extradition bill dodalna avanga buaina hian hi inṭan a ni. Mipuiten na taka an dodal avangin sorkar chuan bill a siam tum hi sutin a hnukdawk tawh a, mahse hemi hnu pawh hian mipuite hian sorkar laka an lungawi lohna hrang hrangte an lantir chhunzawm zel a ni. Mipuite chuan Hong Kong inrelbawl­naah China a inrawlh nasat avanga an lungawi lohna leh, democracy tundin an duhna lantirin an nuar zui zel a ni.