President Trump-a'n Biden thlavang hauh

US President Donald Trump chuan politics lama a khingpui, Joe Biden chungchanga North Korea-in mawi lo taka a sawina chu chhangin, North Korea chu a kal thui mah mah tiin a hrilh. 

Kar liam ta Zirtawpni khan North Korea chuan Joe Biden hi 'ui a, vuakhlum ngai' tiin a sawi a ni. Hei hi Trump chuan a twitter lamah chhang nghalin, kum 2020 US President thlanna neih tura elpui tur nia rin, Democrats president candidate beiseiawm ber Joe Biden chu NKorea in a sawi ang aia a ṭhat zawk thu a sawi. 

North Korea official KCNA news agency chuan Biden hian NKorea ram hotu lu ber zahawmna tihnep sak a tum niin a sawi a, 'Biden ang ui a hi chu an duh anga an tal vek phalsak chuan mi tam tak an ti na ṭhin a ni. Hei vang hian tianga vuakhlum zel an ngai a ni," tiin a sawi. Biden laka NKorea thinrimna chhan tak hi hriatchian a ni lo a, mahse tunhnaia Biden-an a campaign-naa Trump foreign policy sawiselna a tihchhuah avang leh, President Trump-a hnuaiah, 'Dictator leh roreltu nunrawng tak tak ten fak hlawhin, kan thawhpui ṭhinte erawh hnawl an ni ta a ni," tia a sawi vang nia ngaih a ni. 'Nunrawng' tih sawi lai tak hian thlalakah nikum Singapore summit an neiha Trump leh NKorea hotu Kim Jong-Un te  inchibai lai thlalak lantir a ni a, hei hi NKorea chuan a ngaithiam lo hle nia rin a ni. 

Hetihlai hian Biden chuan President Trump-an kar liam ta Zirtawpnia Taliban bomb siamtu thattua puh, thi tura a chungthu relsak tawh, sipai hlui pakhat a ngaidam chu na takin a sawisel. Biden chuan American military justice system-a Trump a inrawlh chu dan kalh a ni a, an ram sipaite zahawmna a tichhia tiin, sipai hotu ni turin President Trump chu a tlak lo a ni, a ti.